برگزاری ششمین نشست کشورهای آسیای مرکزی و اتحادیه اروپا درمورد افغانستان
نمایندگان ویژه‌ی کشورهای آسیای مرکزی و اتحادیه اروپا در ششمین نشست خود درباره افغانستان، تحولات سیاسی، اقتصادی و اجتماعی این کشور را مورد بررسی قرار دادند.
به گزارش خبرگزاری سریع؛ وزارت خارجه تاجیکستان اعلام کرد ششمین نشست کشورهای آسیای میانه و اتحادیه اروپا در مورد افغانستان دیروز، چهارشنبه، ۱۷ دلو، در شهر دوشنبه برگزار شد.
اشتراک‌کنندگان این نشست در مورد وضعیت حقوق بشر در افغانستان، از جمله وضعیت زنان و دختران، چالش‌ها و تهدیدات امنیتی در این کشور گفت‌وگو کردند.
در این نشست همچنین نظرات کشورهای آسیای مرکزی و اتحادیه اروپا برای کمک به افغانستان بررسی شد.
اکثر کشورهای آسیای مرکزی به‌جز تاجیکستان تعامل گسترده سیاسی و اقتصادی با افغانستان دارند و در عین حال بارها از تهدیدات امنیتی ناشی از افغانستان نیز ابراز نگرانی کرده‌اند.
