د لوړو زدهکړو وزیر له جاپان سره د تعلیمي همکاریو دوام ته سترګې په لار یو
په کابل کې د لوړو زدهکړو وزیر، شیخ ندا محمد ندیم، د جاپان له نوي سفیر، ماساموتو کینیچي، سره د تعارفي لیدنې پر مهال د دوه اړخیزو ښو اړیکو پر ټینګښت او د همکارۍ د دوام اهمیت وڅیړ.
شیخ ندا محمد ندیم په دې لیدنه کې د افغانستان د تعلیمي سکتور په تړاو د جاپان د مثبتو تګلارو ستاینه وکړه او له هغه هېواد څخه د وړاندې شویو مرستو او همکاریو مننه یې وکړه. وزیر ټینګار وکړ، چې افغانستان د لوړو زدهکړو په برخه کې د جاپان همکارۍ ته سترګې په لار دی او د دې همکارۍ دوام به د هېواد د زدهکړیزو پروګرامونو د پیاوړتیا لپاره حیاتي اهمیت ولري.
له بلې خوا، سفیر ماساموتو کینیچي د افغانستان د وروستیو پرمختګونو او تعلیمي فعالیتونو د ستاینې ترڅنګ ژمنه وکړه چې جاپان به له افغانستان سره خپلې مرستې او همکاریو ته دوام ورکړي. هغه څرګنده کړه، چې د جاپان حکومت د افغانستان د لوړو زدهکړو په سکتور کې د دوامداره پراختیا لپاره تیار دی او غواړي د زدهکړیزو پروګرامونو ملاتړ وکړي، څو افغان زدهکوونکي په سیمهییزو او نړیوالو معیارونو برابر تعلیم ترلاسه کړي.
دا لیدنه د دواړو هېوادونو ترمنځ د تعلیمي، فرهنګي او پراختیایي همکاریو د پیاوړتیا لپاره مهم ګام ګڼل کېږي او تمه ده چې په راتلونکي کې به د لوړو زدهکړو په برخه کې نورې مهمې پروژې عملي شي.
