نخستین محموله کمک‌های تاجیکستان به زلزله‌زدگان افغانستان رسید
اولین بخش از کمک‌های بشردوستانه تاجیکستان برای زلزله‌زدگان شرق کشور روز یکشنبه به ولایت ننگرهار رسید. این محموله شامل سه‌هزار تُن مواد غذایی و غیرغذایی است که با ۹ لاری به شهر جلال‌آباد منتقل شد.
به گزارش خبرگزاری سریع؛ تاجیکستان نخستین محموله کمک‌های بشردوستانه خود را به ننگرهار ارسال کرد. این کمک‌ها توسط سعید شریفی، سفیر تاجیکستان در افغانستان، به عزیزالله مصطفی، معاون والی ننگرهار تحویل داده شد.
کمک‌های تاجیکستان شامل ۱۲۰ لاری است که تاکنون ۹ لاری آن وارد افغانستان شده است. در محموله روز یکشنبه اقلامی چون سمنت، میل‌گرد، تخته، خیمه، برنج، بوره، روغن، قیماق، مکرونی، آرد و سایر مواد وجود دارد.
سعید شریفی، سفیر تاجیکستان در کابل گفت کشورش همکاری‌های خود را با مردم افغانستان ادامه خواهد داد و پیام تسلیت امام‌علی رحمان، رئیس‌جمهور تاجیکستان، را به زلزله‌زدگان شرق کشور ابراز کرد.
همزمان، ریاست اطلاعات و فرهنگ کنر از توزیع کمک‌های غذایی شرکت ناکامورای جاپان به زلزله‌زدگان این ولایت خبر داد. این کمک‌ها شامل ۹ نوع ماده غذایی بوده و برای یک‌هزار خانواده آسیب‌دیده در دو سرپناه موقت توزیع شده است.
