کابل و دوشنبه؛ تعامل تدریجی در سایه بی‌اعتمادی
در حالی‌که تنش‌های سیاسی و حمایت‌های متقابل از گروه‌های مخالف هنوز بر روابط افغانستان و تاجیکستان سایه انداخته، نشریه اوراسیانت گزارش داده است که تعامل میان دو کشور به‌صورت آهسته و با احتیاط در حال شکل گرفتن است.
به گزارش خبرگزاری سریع؛ نشریه اوراسیانت در گزارش امروز خود آورده است که با وجود اختلاف‌های سیاسی میان کابل و دوشنبه، هر دو طرف روابط خود را مثبت ارزیابی کرده‌اند.
این گزارش در حالی منتشر شده که روز گذشته هیاتی از شرکت برشنا برای اشتراک در نشست پروژه کاسا-۱۰۰۰ به شهر دوشنبه سفر کرده است.
به گفته نشریه اوراسیانت هرچند حکومت سرپرست افغانستان و تاجیکستان از گروه‌های مخالف یک‌دیگر حمایت کرده‌اند اما اکنون زمینه‌هایی برای همکاری اقتصادی و امنیتی میان دو طرف دیده می‌شود. با این‌حال، تقویت این روابط بسیار پیچیده می‌باشد.
سفر اخیر، دومین سفر رسمی یک هیات از حکومت سرپرست به تاجیکستان پس از تسلط مجدد این گروه بر افغانستان به شمار می‌رود. سال گذشته نیز هیاتی از تاجیکستان به کابل سفر کرده بود.
کارشناسان تهدیدهای مرزی، قاچاق مواد مخدر، گسترش افراط‌گرایی و موضوع حمایت از تاجیک‌های افغانستان را از جمله دلایلی می‌دانند که تاکنون مانع تعامل جدی و علنی کابل و دوشنبه شده است.
