انتقال مالکیت طیاره‌های اردوی ملی افغانستان به اوزبیکستان
وزارت خارجهٔ ایالات متحده می‌گوید که واشنگتن تحت یک برنامهٔ خاص، مالکیت شماری از طیاره‌های اردوی پیشین افغانستان را به اوزبیکستان انتقال داده است.
یک سخنگوی وزارت خارجهٔ ایالات متحده در ایمیلی به صدای امریکا نوشت که مالکیت شماری از این طیاره‌ها تحت برنامهٔ “امتعهٔ اضافی دفاعی” (EDA) به اوزبیکستان انتقال داده شده است.
تحت این برنامه، واشنگتن تجهیزات دفاعی اضافی را به دولت های خارجی یا سازمان های بین المللی منتقل می‌کند.
وزارت خارجهٔ ایالات متحده در پاسخ به پرسش صدای امریکا نگاشته است: “توافق این انتقال، در چارچوب همکاری دوجانبه قوی‌ما در زمینه مبارزه با تروریزم، مبارزه با مواد مخدر و افزایش امنیت مرزی صورت گرفته است.”
پیش از این، در واکنش به گزارش رسانه‌های محلی افغانستان در این خصوص، لوی درستیز وزارت دفاع حکومت سرپرست گفته بود که امریکا “از دریا به دیگران آب نبخشد.”
فصیح‌الدین فطرت گفته است: “این طیارات مربوط افغانستان است، از ما است و برای گرفتن این حق خود از هر راه ممکن استفاده می‌کنیم، به اوزبیکستان هم می‌گوییم که حسن همجواری را در نظر گرفته، چنین کاری را قبول نکند که حق کسی دیگر را یک زورمند به آنان بخشش بکند، هیچ‌گاه برای ما قابل قبول نیست که کسی حق ما را به کسی دیگر بدهد.”
همچنان عنایت‌الله خوارزمی، سخنگوی وزارت دفاع حکومت سرپرست در پاسخ به سوالی در مورد طیاره‌های موجود در تاجیکستان گفت که از کشورهای همسایه خواسته شده تا این طیاره‌ها را به افغانستان تحویل دهند.
خوارزمی افزود: “تا هنوز که تحویل نداده، به خاطر ملاحظاتی که شاید دارند، ولی این [طیاره‌ها] متعلق به مردم افغانستان است، از افغانستان است، هر وقت باشد به افغانستان برگردانده خواهد شد.”
بر اساس گزارش‌ها، در اواخر ماه اگست ۲۰۲۱، شماری از پرسونل نظامی افغان همراه با اعضای خانواده‌های شان فقط چند ساعت قبل از سقوط کابل، توسط حدود ۵۰ طیاره و هلیکوپتر به اوزبیکستان و تاجیکستان فرار کردند.
پیش از این، راب لودویک، یک سخنگوی وزارت دفاع امریکا گفته بود که ۴۶ طیاره در اوزبیکستان و ۱۸ طیاره در تاجیکستان وجود دارد که شامل هلیکوپترهای Mi-17 UH-60 و همچنین طیاره‌های بال ثابت PC-12، C-208، AC-208 و A-29 می‌باشند.
با آنهم، شمار دقیق این طیاره‌ها و هلیکوپتر‌ها هنوز معلوم نیست.
