ایران کې شاوخوا ۷۰۰ افغانان د یخنۍ او خطرناکه شرایطو له کبله ژغورل شوي

ایراني چارواکي وايي، د دغه هېواد پولې ساتو ځواکونو شاوخوا ۷۰۰ افغانان ژغورلي، چې هڅه یې کوله په ناقانونه ډول ایران ته ننوځي او د سختې یخنۍ او د ژوند له ګواښ سره مخ وو.
د خراسان رضوي ولایت د سرحدي ساتونکو قوماندان، برید جنرال مجید شجاع، د چارواکو په حواله ویلي، چې د انساني تلفاتو د مخنیوي لپاره دې افغان اتباعو ته طبي او د مرستې لازمې اسانتیاوې برابرې شوې دي. نوموړي ټینګار کړی، چې بهرني اتباع باید یوازې د رسمي او قانوني چینلونو له لارې دې هېواد ته ننوځي؛ که نه، نو د قانون مطابق به ورسره چلند وشي.
ایراني رسنیو د ژغورل شویو اشخاصو د روغتیا وضعیت یا د راتلونکي برخلیک په اړه نور جزییات نه دي ورکړي. په تېرو دوو میاشتو کې ایران په سلګونو افغانان ژغورلي، چې د سړې هوا له څپو سره مخ وو او له طبي مرستو وروسته خپل هېواد ته راستانه شوي دي.
د سره صلیب د نړیوال فدراسیون راپور ښيي، چې تېر کال له ۳.۶ میلیون څخه ډېر افغان کډوال له ایران څخه راستانه شوي، چې له دې ډلې شاوخوا ۱.۲ میلیون په رسمي ډول ایستل شوي دي.
سره له دې، د سرحدي امنیت ټینګښت او د افغان کډوالو د پراخ ایستلو پروسه دوام لري، او د ژمي سختې یخنۍ یې د کډوالو تګ او راتګ نه دي درولې.
ایراني چارواکي دا هم څرګندوي، چې د ژغورنې اقدامات په دې برخه کې د انساني او قانوني مسؤلیتونو د پوره کولو هڅه ده او هڅه کوي چې د افغان اتباعو ژوند خوندي وساتي.