تاجیکستان اخراج گروهی پناه‌جویان افغان را آغاز کرده است
به گزارش خبرگزاری سریع؛ بر اساس گزارش رادیو اروپای آزاد، مقامات تاجیکستان اقدام به بازداشت و اخراج گروه‌های جدیدی از پناهندگان افغان در مناطق اطراف پایتخت این کشور، دوشنبه، کرده‌اند. در این عملیات، ده‌ها تن از افغان‌ها، شامل مردان، زنان و کودکان، از محل سکونت خود خارج و منتقل شده‌اند.
طبق این گزارش که روز جمعه، ۳ اسد (مصادف با ۲۴ جولای) منتشر شد، مقامات تاجیک به صدها پناهنده افغان در شهرهای رودکی و وحدت هشدار داده‌اند که در صورت عدم ترک این کشور ظرف ۱۵ روز، به‌صورت اجباری اخراج خواهند شد.
شاهدان عینی از جمله برخی پناهندگان افغان در شهر وحدت اعلام کرده‌اند که در ۱۵ جولای، خودروهای نظامیان تاجیک به محل زندگی آن‌ها یورش برده و ده‌ها نفر را با خود برده‌اند. به گفته یکی از این پناهندگان، مأموران پولیس اسناد شناسایی آن‌ها را ضبط کرده و مهلتی مشخص برای ترک تاجیکستان تعیین نموده‌اند.
بر اساس آمار کمیساریای عالی پناهندگان سازمان ملل (UNHCR)، تا پایان سال ۲۰۲۴ حدود ۹۹۰۰ پناهنده افغان به‌صورت رسمی در تاجیکستان ثبت‌نام شده‌اند، اما برخی برآوردها حاکی از آن است که شمار واقعی پناهندگان ممکن است به ۱۳ هزار نفر نیز برسد.
