تاجیکستان از درگیری مرزی با قاچاقچیان افغان خبر داد
کمیته امنیت ملی تاجیکستان اعلام کرد که در جریان درگیری مسلحانه با گروهی از قاچاقچیان مواد مخدر در مرز این کشور با افغانستان، یک شهروند افغان کشته و سه نفر دیگر موفق به فرار شده‌اند.
به گزارش خبرگزاری سریع؛ کمیته امنیت ملی تاجیکستان روز گذشته از وقوع یک درگیری مرزی در منطقه ختلان خبر داد. بر اساس گزارش اسپوتنیک تاجیکستان، نیروهای امنیتی و مرزبانان تاجیک هنگام شناسایی و تلاش برای متوقف ساختن چهار فرد مظنون به قاچاق مواد مخدر از افغانستان با آنها درگیر شدند.
در جریان این درگیری، یکی از مظنونان که افغان بوده، کشته شده و سه نفر دیگر به داخل خاک افغانستان گریخته‌اند.
به گفته مقامات تاجیکستان، از این گروه حدود ۷۲ کیلوگرام مواد مخدر، یک قبضه سلاح کلاشینکف و مقداری مهمات نظامی کشف و ضبط شده است.
کمیته امنیت ملی تاجیکستان تأکید کرده است که تحقیقات درباره این رویداد ادامه دارد و گروه‌های جرایم سازمان‌یافته فراملی همچنان در مناطق مرزی با افغانستان، تهدیدی جدی برای امنیت منطقه به شمار می‌روند.
