تاجیکستان ۴۹ مهاجر افغان را اخراج کرد
وزارت مهاجرین و عودت‌کنندگان اعلام کرده که طی روزهای هفتم و هشتم جوزا، ۴۹ مهاجر افغان از سوی دولت تاجیکستان اخراج شده‌اند. این در حالی است که برخی از اخراج‌شدگان دارای کارت اقامت و مدارک قانونی بوده‌اند.
به گزارش خبرگزاری سریع؛ بنابر اعلام وزارت مهاجرین و عودت‌کنندگان حکومت سرپرست، در جریان روزهای چهارشنبه و پنج‌شنبه، ۷ و ۸ جوزا، مجموعاً ۴۹ مهاجر افغان از خاک تاجیکستان اخراج شده‌اند. این افراد از طریق بندر شیرخان به ولایت قندوز وارد شده‌اند.
در خبرنامه این وزارت آمده است که از میان این افراد، ۳۶ نفر دارای کارت اقامت در تاجیکستان و ۱۲ نفر دیگر دارای گذرنامه و ویزای معتبر بوده‌اند. تاکنون دلایل مشخصی درباره اخراج این افراد اعلام نشده است.
بر اساس گزارش‌ها، در هفته‌های اخیر روند اخراج مهاجران افغان از تاجیکستان افزایش یافته و حتی برخی پناهجویانی که نزد آژانس پناهندگان سازمان ملل ثبت‌نام شده‌اند نیز بدون هشدار قبلی از این کشور اخراج شده‌اند.
سازمان ملل متحد پیش‌تر از تاجیکستان خواسته بود که از اخراج پناهجویان افغان به‌ویژه افراد دارای مدارک معتبر خودداری کند. طبق آمارهای رسمی، تا پایان سال ۲۰۲۴ نزدیک به ۹ هزار افغان در تاجیکستان اقامت داشتند.
