دراني وايي د ترهګرو پټنځایونه د افغانستان اړیکې زیانمنې کړي
د افغانستان لپاره د پاکستان پخواني ځانګړي استازي اصف دراني ویلي چې د نړۍوالې ټولنې سره د اسلامي امارت اړیکې هغه مهال زیانمنې شوې چې دغه اداره ځینو ترهګرو ډلو ته خوندي پټنځایونه ورکړي دي. دراني دغه څرګندونې د چهارشنبې په ورځ کړي دي.
نوموړي ټینګار کړی چې که افغانستان ثبات، اقتصادي رغونه او عادي نړیوالې اړیکې غواړي، باید تمرکز یې له بهرني ملامتۍ کور دننه حسابورکونې ته واوړي. په ځانګړې توګه د افغانستان په خاوره کې د ترهګرو د خوندي پټنځایونو پر وړاندې باید باور وړ او عملي اقدامات وشي.
دراني په ډاګه کړې چې په افغانستان کې د تحریک طالبان پاکستان (ټيټيپي)، داعش خراسان، القاعده او ځینو نورو ډلو دوامدار حضور پاکستان او سیمې ته مستندې امنیتي پایلې لري. د هغه په وینا، یاد واقعیت له پامه غورځول یا کمارزښته ګڼل د افغانستان ګټې نه خوندي کوي، بلکې نړیوالې اندېښنې زیاتوي او هېواد یې په انزوا کې ساتي.
دا څرګندونې په داسې حال کې دي چې پاکستاني چارواکي یې په وار وار تکرار کړي، خو اسلامي امارت بیا دغه ادعاوې ردوي او وایي، چې د افغانستان خاوره به د هیچا پر ضد ونه کارول شي.
