د نیپال لومړنۍ ښځینه لنډمهاله وزیره: سوشیلا کارکي د حکومت پر ضد مظاهرو وروسته ټاکل شوه
د نیپال د سترې محکمې پخوانۍ قاضي القضات سوشیلا کارکي د فساد ضد تاوتریخجنو مظاهرو په ترڅ کې د حکومت له نسکورېدو وروسته د دغه هېواد لنډمهاله لومړۍ وزیره ټاکل شوې ده.
د مظاهرو له سمبالوونکو یا مشرانو سره تر یوې هوکړې وروسته ۷۳ کلنې کارکي د یوې لنډې غونډې پرمهال لوړه وکړه او لومړنۍ نیپالۍ شوه چې د دغه بېوزله همالیايي هېواد د لنډمهاله لومړۍ وزیرې په توګه د خپل هېواد مشري سمبالوي.
د یادولو ده چې په نیپال کې پر خواله رسنیو د بندیز لګولو په غبرګون کې د حکومت پر ضد د راپارېدلو اعتراضونو پر مهال په شاوخوا یوه اوونۍ کې نږدې ۵۰ تنه ووژل شول.
د تېرې دوشنبې په ورځ حکومت خپله پرېکړه بېرته واخیستله او بندیز یې ختم کړ خو تر هاغه اوبه له ورخه تېرې وې او مظاهرو د حکومت او فساد ضد تحریک بڼه غوره کړې وه.
د پراخو تاوتریخجنو اعتراضونو په ترڅ کې لومړي وزیر کېپي شرما اولي استعفا ورکړه خو پارېدلو مظاهرهچیانو د پارلمان ودانۍ ته اور واچاوه.
