د پاکستان د بهرنیو چارو وزیر تایید کړه چې په کابل کې يې سفیر احضار شوی
د پاکستان د لومړي وزیر مرستیال او د بهرنیو چارو وزیر، اسحاق ډار، تایید کړه چې په افغانستان کې د اسلامي امارت حکومت د پاکستان سفیر احضار کړی او د خوست او ننګرهار ولایتونو کې د وروستیو ډرون بریدونو په تړاو یې اعتراضپاڼه ورته سپارلې ده.
ښاغلي ډار دا څرګندونې تېره شپه (جمعه، اګست ۲۹ / وږی ۷) په اسلام اباد کې په یوه خبري کنفرانس کې وکړې. هغه زیاته کړه چې د دې اعتراضپاڼې یوه کاپي یې لوستې، خو په وینا یې، “د اندېښنې څه خبره نه شته او لا وختي دی چې په دې اړه څه وویل شي.”
دا څرګندونې داسې مهال کېږي چې د اسلامي امارت حکومت په افغانستان کې د خوست او ننګرهار د ډرون بریدونو مسوولیت پر اسلام اباد ور اچولی او په کابل کې یې د پاکستان سفیر د خپل احتجاج لپاره احضار کړی و.
خو ښاغلي ډار په واضح ډول نه تایید کړه او نه یې هم رد کړه چې یاد بریدونه د پاکستان له خوا ترسره شوي دي، او په دې اړه یې ژر پرېکړه یا څرګندونې رد کړې.
