عراقچي وايي تهران او واشنګټن تر اوسه مستقیمې خبرې نهدي کړي
د ایران د بهرنیو چارو وزیر عباس عراقچي ویلي، په وروستیو ورځو کې د تهران او امریکا د ځانګړي استازي سټیو وېټکاف ترمنځ هېڅ مستقیمه اړیکه یا خبرې نهدي ترسره شوې.
نوموړي څرګنده کړې چې د خبرو لپاره له امریکایي لوري کوم رسمي وړاندیز هم نهدی ترلاسه شوی او د دواړو خواوو ترمنځ د تماسونو په اړه خپرېدونکي اټکلونه له واقعي وضعیت سره سمون نه لري.
د هغه په وینا، سره له دې چې مستقیم تماس نهشته، ځینې هېوادونه د منځګړو په توګه سیاسي سلامشورې کوي او له ایران سره اړیکې ساتي، څو د احتمالي ډیپلوماټیکو لارو چارو ارزونه دوام ومومي.
عراقچي ټینګار کړی چې د سیمې او نړۍ د مهمو سیاسي موضوعاتو په تړاو غیرمستقیم تعاملات یو معمول ډیپلوماټیک بهیر دی، خو دا چاره د رسمي خبرو مانا نه لري. هغه زیاته کړې چې د هر ډول رسمي بهیر لپاره باید واضح چوکاټ، متقابل درناوی او سیاسي اراده موجوده وي.
دا څرګندونې په داسې وخت کې کېږي چې د تهران او واشنګټن اړیکې لا هم له سیاسي حساسیتونو ډکې بلل کېږي او د دواړو هېوادونو ترمنځ هر ډول احتمالي تماس د سیمې پر سیاسي وضعیت اغېز لرلی شي.
