غزني شپږ مېرمنې د کورني تاوتریخوالي له چنګاله ژغورل شوې
د غزني د امربالمعروف، نهي عنالمنکر او د شکايتونو اورېدلو ریاست وایي، چې د تېرې یوې اوونۍ په ترڅ کې محتسبینو د ګېرو، مقر او خوګياڼو ولسواليو کې شپږ مېرمنې له کورني تاوتریخوالي ژغورلې دي.
د ياد رياست د رسنيو دفتر ويلي، دا مېرمنې له دوو تر اتو کلونو پورې د خپلو خاوندانو او خسرګنیو له لوري له ناسم چلند او رواني او فزیکي فشارونو سره مخ وې او له خپلو شرعي حقونو بېبرخې پاتې شوې وې.
مسوولین زیاتوي، چې د محتسبینو له لوري د یادو مېرمنو خاوندانو او خسرګنیو ته د ښه چلند، د ښځو د حقونو او د کورني ژوند د سمون په اړه د شریعت په رڼا کې لازمې سپارښتنې شوې او ترې ژمنه اخیستل شوې، چې له دې وروسته به پر یادو مېرمنو هېڅ ډول ظلم نه کېږي او د ټولو شرعي حقونو تر څنګ به ورسره ښه چلند کېږي.
دا په داسې مهال ده، د اسلامي امارت په بيا واکمنېدو سره د امربالمعروف، نهي عنالمنکر او د شکايتونو اورېدولو وزارت محتسبينو په مرکز کابل سربېره ګڼو ولايتونو کې په لسګونه مظلومې مېرمنې له کورني تاوتريخوالي ژغورلې او له خپلو اسلامي او انساني حقونو يې برخمنې کړې دي.
