مجاهد: قاچاق مواد مخدر به تاجیکستان همچنان ادامه دارد

به گزارش خبرگزاری سریع؛ ذبیح‌الله مجاهد، سخنگوی ارشد حکومت تأیید کرد که قاچاق مواد مخدر از افغانستان به تاجیکستان هنوز متوقف نشده است. وی در گفت‌وگو با رادیو-تلویزون ملی گفت که طولانی بودن مرز مشترک باعث می‌شود قاچاقچیان گاهی از آن سوءاستفاده کنند.

مرزبانی تاجیکستان دهم دلو اعلام کرد که در درگیری با گروهی از افراد مسلح در مرز افغانستان، که به گفته مقام‌ها قاچاقچی بودند، سه نفر کشته شدند. کمیته امنیت ملی تاجیکستان افزود که در این عملیات چند اسلحه و چهار کیسه حاوی ۷۳ بسته حشیش و تریاک کشف و ضبط شده است.

مجاهد همچنین گفت اداره کابل در تلاش است مسائل مرزی را مدیریت کرده و مانع قاچاق مواد مخدر شود. وی تأکید کرد که مقامات افغانستان و تاجیکستان هماهنگ هستند و امیدوارند در آینده بتوانند از قاچاق مواد مخدر جلوگیری کنند.