هرات: د لویدیځ زون هنرمندان د خپلو لاسي تولیداتو نړیوال نندارتون جوړ کړ
د هرات ښار په اختیار الدین کلا کې د لویدیځ زون د هنرمندانو او متشبثینو هنري او لاسي تولیدات نندارې ته وړاندې شوي دي.
دغه آثار او لاسي تولیدات به د ۷ ورځو لپاره په سل غرفو کې نندارې ته ایښودل شوي وي.
دغه نندارتون د هرات د اطلاعاتو او کلتور ریاست او د ترکیې د تیکا دفتر په ګډه جوړ کړی دی.
د هرات د اطلاعاتو او کلتور ریاست د هنر او فرهنګ امر، حمیدالله غیاثي په دې اړه داسې وايي: «موږ ګورو چې بهرني ګرځندویان په زیاتېدونکي ډول هرات ته راځي او د هرات تاریخي، تمدني او لرغونو ځایونو څخه لیدنه کوي.»
په هرات کې د ترکیې د تیکا دفتر مشر، عرفات دنیز هم وايي: «موږ تل له نندارتونونو ملاتړ کوو، که هغه د ګرځندوی برخه وي، که د هنر او لاسي صنایعو برخه وي، یا د کورنیو تولیداتو برخه وي. موږ لیوال یو چې له دا ډول نندارتونونو ملاتړ کړو، ځکه پوهېږو چې دا نندارتونونه د تولیدوونکو او هنرمندانو د ظرفیت لوړولو زمینه برابروي.»
ځینې بهرني ګرځندویان وایي چې د امنیت تامین، تاریخي ځایونو لیدلو او د افغانانو مېلمه پالنه ورته خورا جالبه وه.
برېټانوي ګرځندوی، سیزار ویلي: «د خلکو د مېلمه پالنې له نظره زه رښتیا هم اغېزمن شوی یم. زه ډېر حیران شوم چې خلک څومره مېلمهپاله دي. افغانان واقعاً د خپلو مېلمنو خدمت کوي. ما پام کړی چې تاسو له خپلې کورنۍ، خویندو او وروڼو سره ډېر نږدې اړیکه لرئ. پوهېږئ، تاسو یوه ډېره نږدې اړیکه لرئ.»
یوشمېر غرفه لرونکي د اقتصادي ستونزو او د خپلو تولیداتو او هنري آثارو د بازار نشتوالي له امله اندېښمن دي.
هغوی غوښتنه کوي چې له هېواده بهر هم باید ورته دا ډول نندارتونونه برابر شي.
غرفه لرونکی، محمد ابراهیم حبیبي بیا داسې وايي: «یوازې دې د ګرځندوی د ورځې په مناسبت د نندارتونونو په جوړولو بسنه نه کېږي. باید په بېلابېلو ولایتونو او بېلابېلو وختونو کې دایمي نندارتونونه جوړ شي.»
یو بل غرفه لرونکی، محمد ظاهر درویشي هم وايي:«د اطلاعاتو او فرهنګ وزارت دې له نورو هېوادونو، ادارو او سفارتخانو لیدونکي دعوت وکړي چې د دې نندارتون لیدنه وکړي. که داسې وشي، نو افغانستان ته د ګرځندویانو راتګ به زیات شي.»
محمد اختر حیدري هم چې هلته غرفه پرانیستې وايي: «دا نندارتون د هنرمندانو آثار نړېوالې ټولنې ته معرفي کوي او ښيي چې زموږ په هېواد کې داسې هنرمندان شته.»
د دغه نندارتون موخه د هنري آثارو، لاسي صنایعو او د لیدو وړ ځایونو پېژندنه ده څو د بهرنیو ګرځندویانو پام راجلب کړي.
