هند: د هیماچل پردېش په بس پېښه کې لږ تر لږه ۱۵ کسان مړه شوي، درې ټپیان
د هند د شمال هیماچل پردېش ایالت چارواکي وايي، لږ تر لږه ۱۵ تنه هغه مهال مړه شوي چې یو بس له ځمکې ښویېدو سره مخ شوی او درې نور ټپیان دي. دا پېښه د دغه ایالت په یوه غرني سړک کې شوې ده.
د قربانیانو د کورنۍ یوه غړي ویلي: «زما مېرمن، د ورور مې مېرمن، زما دوه ماشومان او د هغه دوه ماشومان په هغه بس کې وو.»
د ایالت د لومړي وزیر مرستیال، موکول اګنیهوټري، ویلي: «پنځلس تنه مړه شوي دي. تر اوسه ۱۸ تنه له سیمې را ایستل شوي چې درې تنه یې روغتون ته لېږدول شوي دي. لا هم څرګنده نه ده چې ټولټال څومره مسافر په بس کې وو.»
هغه زیاته کړه چې دا ځمکښویېدنه د کولو (Kullu) په غرني سیمه کې د سختو بارانونو له امله شوې او د ډېرو خټو او ډبرو د ښویېدو له کبله د مسافر وړونکي بس سره ټکر شوی دی.
د ژغورنې ټیمونه او سیمهییز پولیس سمدستي سیمې ته رسېدلي او د ورکو کسانو د لټون عملیات دوام لري.
د ملي غبرګون د ځواک مرستیال قوماندان، کارام سېنګ، ویلي: «تر اوسه زموږ ټیمونو د ۱۵ کسانو مړي او دوه ژوندي کسان له سیمې را ایستلي دي. د سیمهییزو چارواکو د معلوماتو له مخې، یو کس لا هم ورک دی او عملیات به تر هغې دوام وکړي څو هغه وموندل شي.»
د هند لومړي وزیر، نریندرا مودي، د قربانیانو له کورنیو سره د خواخوږۍ څرګندونه کړې او امر یې کړی چې هرې قرباني کورنۍ ته له ملي بیړني صندوقه دوه لاکه (نږدې ۲۲۵۰ امریکایي ډالر) او ټپیانو ته ۵۰ زره روپۍ ورکړ شي.
