پاکستان: بنو کې د اېف‌سي پر مرکز ځانمرګی برید، شپږ امنیتي سرتېري وژل شوي

د پاکستان پوځ وايي د خيبر پښتونخوا په بنو کې د امنيتي ځواکونو (اېف سي) پر مرکز ځانمرګي بريد کې شپږ امنيتي کسان وژل شوي دي.
د پاکستان پوځ د عامه اړیکو دفتر (ای اېس پي ار) د سې شنبې په ورځ خپره شوې اعلاميه کې ويلي، وسله والو له چاودېدونکو ډک موټر د اېف سي د مرکز له دېوال سره ټکر کړی چې د دېوال له نړېدو سربېره هلته ملکي ودانۍ ته هم زيان رسېدلی او دری تنه ملکيان ټپيان شوي دي.
د پاکستان پوځ د اعلاميې له مخې د ډزو په تبادله کې د پنځو وسله والو تر څنګ شپږ امنيتي کسان وژل شوي دي.
د ای اېس پي ار په وينا په سیمه کې چاڼيز عمليات دوام لري او په وينا يې په پېښه کې ښکېل کسان به د قانون منګولو ته وسپارل شي.