ویټکاف او عراقچي د خبرو اترو د دوام لپاره سویس ته روان شول
د رویټرز خبري اژانس د راپور له مخې، د امریکا ځانګړی استازی سټیف ویټکاف او د ایران اسلامي جمهوریت د بهرنیو چارو وزیر عباس عراقچي د خبرو اترو د دوام لپاره سویس ته روان شوي دي.
راپورونه ښيي چې دا لیدنه په داسې وخت کې ترسره کېږي چې د ایران اسلامي جمهوریت او امریکا ترمنځ د تفاهم او ډیپلوماټیکو هڅو بهیر د نړیوالو پام ځانته اړولی او د سیمې د ثبات لپاره مهم بلل کېږي.
بلخوا، په لبنان کې هم د اوربند په تړاو مثبت پرمختګونه شوي او ښکېلو لورو د تاوتریخوالي د کمولو په موخه پر ځینو اقداماتو سلا کړې ده. شنونکي باور لري چې دا پرمختګونه کولای شي د سیمې د ارامۍ او سیاسي تفاهم لپاره لا مناسب شرایط رامنځته کړي.
کارپوهان وایي، د سویس خبرې اترې د متقابل تفاهم د پیاوړتیا، د سیمهییزو ستونزو د سولهییز حل او اقتصادي ثبات لپاره مهم ارزښت لري. همداراز تمه کېږي چې د خبرو بریالیتوب د هرمز تنګي د عادي تګراتګ، د نړیوالو انرژۍ بازارونو د ثبات او د سوداګریزو اړیکو د لا پیاوړتیا لپاره هم مثبتې پایلې ولري.
