په اسرائیلي ټولنه کې د مذهبي او سیکولر ډلو اختلافات زیات شوي
د راپورونو له مخې، په اشغال شویو سیمو کې د مذهبي او سیکولر ډلو ترمنځ اختلافات په وروستیو اوونیو کې زیات شوي او د اسرائیلي ټولنې دننه یې د ژور ټولنیز واټن بڼه غوره کړې ده.
د عبري رسنیو د معلوماتو له مخې، دغه اختلافات یوازې تر سیاسي بحثونو محدود نه دي پاتې شوي، بلکې عامه ځایونو لکه کافېګانو، سوداګریزو مرکزونو او تفریحي سیمو ته هم رسېدلي دي.
په وروستۍ پېښه کې، د رامات ګان ښار یوه کافه په شاوخوا یوه نیمه میاشت کې درې ځله د اورلګېدنې هدف ګرځېدلې ده. عبري رسنیو ویلي چې د دغو پېښو لامل د شنبې په ورځ د یاد مرکز فعالیت بلل شوی؛ هغه موضوع چې د افراطي مذهبي جریانونو له نظره د یهودي دیني اصولو خلاف ګڼل کېږي.
راپورونه ښيي چې په اشغال شوي قدس کې هم د شنبې په ورځ د سوداګریزو مرکزونو د فعالیت پر سر اختلافات زیات شوي او یو شمېر مذهبي او سیاسي څېرو په دې اړه خپل اعتراضونه څرګند کړي دي.
همداراز د اسرائیلي رژیم ۱۳م ټلوېزیون راپور ورکړی چې د وروستیو لاریونونو پر مهال د حریدي مذهبي ډلو او سیکولر جریانونو ترمنځ نښتې رامنځته شوې او پولیسو د وضعیت د کنټرول لپاره مداخله کړې ده.
