اردوغان وایي د مکې تړون لاسلیککوونکي هېوادونه به د برید پر مهال ګډ غبرګون وښيي
د ترکیې ولسمشر رجب طیب اردوغان ویلي، د سعودي عربستان، ترکیې او پاکستان ترمنځ د مکې تړون ځینې برخې د ناټو له پنځمې مادې سره ورته والی لري.
اردوغان څرګنده کړې چې د تړون له مخې، که پر یوه غړي هېواد برید یا جدي امنیتي ګواښ رامنځته شي، درې واړه هېوادونه به ګډ دفاعي اقدامات وکړي.
نوموړي ویلي، دغه هوکړه د متقابلې دفاع پر اصل ولاړه ده او د درېیو هېوادونو ترمنځ امنیتي همکارۍ پیاوړې کوي.
د مکې تړون څو ورځې مخکې د پاکستان، سعودي عربستان او ترکیې ترمنځ لاسلیک شو او مشرانو یې د درېیو هېوادونو لپاره مهم وباله.
اردوغان ویلي، د تړون موخه د درېیو هېوادونو د ګډو امنیتي ګټو ساتنه او د احتمالي ګواښونو پر وړاندې همغږي ده.
دغه هوکړه په داسې مهال شوې چې په سیمه کې د امنیتي وضعیت په اړه اندېښنې او ترینګلتیاوې زیاتې شوې دي.
