د کرنې وزیر د نړیوال فورم لپاره تاشکند ته ورسېد
د اسلامي امارت د کرنې، اوبو لګولو او مالدارۍ وزیر عطاءالله عمري د ازبکستان د کرنې وزارت په بلنه د خوړو خوندیتوب او دوامدارې پراختیا په اړه نړیوال تخنیکي فورم کې د ګډون لپاره تاشکند ته رسېدلی دی.
د کرنې وزارت په خبرپاڼه کې ویلي، دغه فورم نن او سبا د وچې په منځ کې ایسارو هېوادونو د کارپوهانو او استازو په ګډون جوړېږي او پر تخنیکي بحثونو، د تجربو او پوهې پر شریکولو او عملي همکاریو تمرکز کوي.
وزیر عمري به د سفر پر مهال له ازبکستان او ګډونکوونکو هېوادونو سره د کرنې، اوبو لګولو، مالدارۍ، سوداګرۍ او پانګونې په برخو کې د همکاریو پر پراختیا خبرې وکړي.
همداراز به د افغانستان د کرنیزو محصولاتو صادراتو، سوداګرۍ پراختیا، پانګونې جلبولو او مسلکي تجربو لېږد په اړه له بېلابېلو استازو سره لیدنې ولري.
