حزبالله: د نصرالله له مرګ یو کال وروسته هم د جګړې او مقاومت لاره دوام لري
لبناني وسلهوال ډله حزبالله د شنبې په ورځ د خپل پخواني مشر، حسن نصرالله د وژل کېدو یو کال نمانځي.
د ۲۰۲۴ کال د سپټمبر پر ۲۷مه ماښام، د اسرائیل د بنکر ماتونکو بمونو لړۍ د بیروت په سویل کې د حزبالله پر یوه کمپلکس ولګېده چې په پایله کې یې نصرالله ووژل شو.
نصرالله له ۳۰ کلونو ډېر وخت د حزب الله ډلې، سیاسي او پوځي مشري پر غاړه درلوده.
د نصرالله مرګ او ورپسې جګړې پر ایرانپلوه حزبالله درانه ګوزارونه وکړل.
د هغه ټاکل شوی ځایناستی، هاشم صفیالدین، هم څو اونۍ وروسته ووژل شو.
د رویټرز د راپور لمخې اوس پر دې ډلې فشارونه زیات شوي چې وسله پر ځمکه کېږدي، خو حزبالله دا غوښتنه رد کړې ده.
نصرالله په ۱۹۹۲ کال کې یوازې د ۳۵ کلونو په عمر کې د حزبالله عمومي منشي شو، وروسته له دې چې د هغه مخکینی مشر سید عباس موسوي په یوه اسرائیلي هلیکوپټري برید کې ووژل شو.
نصرالله د خپلو تندو ویناو په مټ ژر د دغې ډله عامه څېره وګرځېد چې په اصل کې د ایران د انقلابي ځواک له خوا په ۱۹۸۲ کال کې د اسرائیلي ځواکونو پر ضد د مبارزې لپاره جوړه شوې وه.
