روسیه د اوکراین ۷۱ ډرونونه شنډ کړل، جګړه په ختیځ کې توده ده
د روسیې دفاع وزارت اعلان کړی چې د دغه هېواد د هوايي دفاع ځواکونو د اوکراين ۷۱ بېپیلوټه الوتکې په بېلابېلو ولایتونو کې شنډې کړې دي. وزارت په خپره شوې خبرپاڼه کې ویلي، چې د دغه بریدونو مخه د هېواد په څو سیمو کې په بریالیتوب سره نیول شوې ده.
د خبرپاڼې له مخې، په بریانسک ولایت کې ۲۹، په کورسک کې ۷، په لیپیټسک کې ۵ او په سمولنسک ولایت کې هم ۵ بېپیلوټه الوتکې په نښه شوې او له منځه وړل شوې دي. همدارنګه، د اوریول، ټویرف، سامارا، کالوګا، روستوف، تولا او د تور سمندر په سیمه کې هم څو نورې بېپیلوټه الوتکې شنډې شوې دي.
د روسیې دفاع وزارت ویلي، چې د اوکراین د دې هوايي بریدونو موخه د روسي پوځ پر نظامي تاسیساتو او زیربناوو برید کول وو، خو د هوايي دفاع ځواکونو د چټک غبرګون له امله دغه بریدونه له ناکامۍ سره مخ شوي دي.
په ورته وخت کې، روسي ځواکونو د دونیتسک په بوکروفسک او د خارکیف په کوبیانسک ښارونو کې جګړهييز پرمختګ کړی دی. د روسي پوځ د راپور له مخې، د ډنیپروپتروسک د جنوبي ختیځ په سیمه کې يو مهم کلی هم د هغوی تر پوځي کنټرول لاندې راغلی دی.
اوکرایني چارواکو د بوکروفسک وضعیت سخت او ترینګلی بللی، خو ویلي يې دي چې د دوی ځواکونه لا هم د دفاعي لیکو د ساتنې لپاره جګړه کوي او د روسي پوځ د پرمختګ مخه نیسي.
د جګړې د دواړو لورو ترمنځ وضعیت لا هم ترینګلی دی، او د نظامي شنونکو په باور، د ژمي له رارسېدو سره ښايي د دواړو هېوادونو د جګړې بڼه لا پېچلې او اوږده شي.
