لوګر: د محمداغې په ولسوالۍ کې د غلو نهه‌کسیزه ډله ونیول شوه

د لوګر امنیه قومانداني وایي چې د دغه ولایت په محمداغه ولسوالۍ کې د غلو یوه نهه‌کسیزه ډله نیولې شوې ده.

د لوګر د امنیې قوماندانۍ ویاند مولوي احمدالله انس رسنيو ته ویلي چې د غلو دغه ډله د محمداغې ولسوالۍ په «دهنو» کلي کې د امنیتي ځواکونو له خوا هغه مهال نیول شوې چې د عاشق‌الله په نوم د یوه کس کور ته د غلا لپاره ورغلي وو.

هغه زیاته کړه، له نیول شوو غلو یو شمېر وسلې او د غلا شوي ځیني وسایل هم ترلاسه شوي دي.

انس زیاتوي، نیول شوو کسانو پر خپل جرم اعتراف کړی چې ډېر ژر به عدلي او قضايي ارګانونو ته وروپېژندل شي.