هند ناوې د واده له یوې ورځې مخکې په مرموز ډول ووژل شوه
یوې ۲۲ کلنې ناوې چې د خپل واده نېټې ته یوازې یوه ورځ پاتې وه، په هند کې د یوه داسې کس له لوري ووژل شوه چې نوم یې د هغې په لاس لیکل شوی و. د دې پیښې دردونکې او مرموزه بڼه د ټولې سیمې خلکو اندېښمن کړي دي.
د هند د ګجرات ایالت د بهاونګر ولسوالۍ چارواکي وایي، سوني راټهور چې د نومبر پر ۱۵مه یې د واده مراسم ټاکل شوي وو، د واده له تیاريو وروسته ناڅاپه ورکه شوه. د کورنۍ غړو او د هغې ورور ټوله شپه لټون وکړ، خو هېڅ ډول معلومات تر لاسه نشول. د دوی د تمې پر خلاف، سهار وختي د ناوې د مړینې خبر کورنۍ ته ورسېد، چې ټول یې له سخته صدمې سره مخ کړل.
پولیس وايي سوني په داسې حال کې مړه وموندل شوه چې په لاس یې لیکل شوی نوم د هغه کس و، چې اوس د هغې په وژنه کې د اصلي مشکوک په توګه تر نیول کېدو لاندې دی. له حیرانوونکو حقایقو څخه دا هم ده، چې د سوني واده د همدې کس ــ ساجن بریا ــ سره ټاکل شوی و. چارواکي وایي د دواړو تر منځ د اړیکو او شخړو د څرنګوالي په اړه پلټنې روانې دي.
د پولیسو یوه سرچینه دغه پېښه «ډېر حساس او کورني اړخ لرونکی قتل» بللی او ویلي یې دي چې د سوني د ورکېدو له شېبې نیولې تر موندلو پورې د سیمې امنیتي ځواکونو پراخ عملیات ترسره کړي دي. د هغوی په وینا، لومړنۍ نښې ښيي چې ناوې د واده له مراسمو مخکې له سخته تاوتریخوالي سره مخ شوې وه.
سیمه ییزې رسنۍ وایي چې د سوني کورنۍ لا هم د پېښې له روحي ټکان سره مبارزه کوي. د هغوی په وینا، سوني د واده لپاره د نکریزو مراسم ترسره کړي وو، لاسونه یې په رنګین نقشونو رنګین شوي وو، او د کورنۍ ټول غړي د هغې د نوي ژوند د پیل لپاره په خوشحالۍ بوخت وو.
چارواکي وایي چې د وژل شوې ناوې د جسد قانوني معاینه روانه ده او تر بشپړولو وروسته به د قتل د دقیق علت په اړه نور جزئیات شریک شي. په عین حال کې، د پولیسو یوه ځانګړې ډله د تورن کس د اعترافاتو، اړیکو، او ممکنه انگیزو څېړنه کوي.
سیمه کې د دې پېښې له خپرېدو وروسته پراخ غبرګونونه راپورته شوي او د ښځو پر وړاندې تاوتریخوالي د مخنیوي لپاره د سختو قانوني اقداماتو غوښتنې شوې دي.
