ټولګټو وزارت په یوه اوونۍ کې د رېلپټلۍ له لارې ۱۵۳ زره ټنه توکي لېږدول شوي
د ټولګټو وزارت ویاند محمد اشرف حقشناس اعلان کړی چې د لړ میاشتې له دېرشمه تر ليندۍ شپږمې پورې د رېلپټلۍ له لارې د هېواد د وارداتو او صادراتو بهیر پر پخوا پرتله چټک شوی او په دې اوونۍ کې ټولټال ۱۵۳ زره او ۳۹۳ مټریک ټنه توکي لېږدول شوي دي. د ده په وینا، دا حجم د افغانستان د رېلپټلۍ د ترانسپورټ په برخه کې د ثابتې ودې او اغېزمن مدیریت څرګندونه کوي.
حقشناس وايي، د حیرتان بندر له لارې ۱۰۸ زره ۷۲۲ ټنه بار انتقال شوی، چې تر ټولو لوړ حجم جوړوي. له آقینې ۱۰ زره ۴۲۱ ټنه، د تورغونډۍ له لارې ۱۹ زره ۸۶۷ ټنه او د خواف – هرات له لاین څخه ۱۴ زره ۳۸۳ ټنه نفتي، غیر نفتي او نور سوداګریز توکي لېږدول شوي دي. د وزارت د معلوماتو له مخې، یاد لېږدونه په منظمه توګه ترسره شوي او د رېلپټلۍ تخنیکي ټیمونو هڅې د بهیر د لا چټکولو لامل ګرځېدلې دي.
ویاند زیاتوي، په همدې موده کې ۶۳ ټنه توکي د هېواد له لارې بهر ته صادر شوي، چې ډېره برخه یې وچه مېوه جوړوي. د هغه په خبره، د صادراتو حجم که څه هم محدود دی، خو د کیفیت او د نړیوالو بازارونو له غوښتنو سره د سمون له امله یې ارزښت مهم ګڼل کېږي.
وزارت ټینګار کوي چې سوداګرو ته د لا زیاتې آسانتیا، د اسنادو د پروسس چټکتیا او د بار لېږد ظرفیت پراخولو لپاره کارونه روان دي. سرچینې وایي، هڅې په دې موخه کېږي چې د رېلپټلۍ د لاینونو تخنیکي کچه لوړه شي، تر څو د وارداتو او صادراتو بهیر له ځنډ پرته ترسره شي او اقتصادي فعالیتونه نور هم ګړندي شي.
