په امریکا کې ۳۷ کلن امریکايي د فدرالي مامورانو په ډزو وژل شوی

په امریکا کې د مینه‌سوټا ایالت مینیاپولیس ښار کې فدرالي مهاجرت مامورانو یو ۳۷ کلن امریکايي وګړی په ډزو وژلی دی. چارواکي وایي، ډزې د ځان د دفاع په موخه شوې دي، خو خپرې شوې ویډیوګانې ښيي چې ښايي نوموړي وسله نه، بلکې یوازې موبایل ټیلیفون درلود.
د وژل شوي کس پېژندنه ښيي چې هغه یو روغتیايي کارکوونکی و. له دې پېښې وروسته، سره له دې چې هوا ډېره سړه ده، په ښار کې لاریونونه پیل شوي او خلکو د فدرالي مهاجرت مامورانو پر کړنو نیوکې کړې دي.
دا پېښه په داسې حال کې شوې چې تر دې وړاندې هم په همدې ښار کې ورته پېښو د عامه غبرګونونو لړۍ پارولې وه.