چین د څلور پوړیزې ودانۍ اورلګېدنه؛ ۱۲ تنه مړه، څېړنې روانې دي
چینايي رسنیو راپور ورکړی چې د دغه هېواد په جنوب کې د اورلګېدنې له امله لږ تر لږه ۱۲ کسان مړه شوي او یو شمېر نور ټپیان شوي هم دي.
د راپورونو له مخې، اورلګېدنه تېره شپه شاوخوا نهه بجې د ګوانګ دونګ ولایت په شانتو ښار کې د یوې څلورپوړیزې ودانۍ دننه رامنځته شوې ده. چارواکي وایي چې اورلګېدنه شاوخوا یو ساعت دوام کړی او د پېښې د لامل په اړه څېړنې پیل شوې دي.
چین کې تر دې مخکې هم د ورته اورلګېدنو له امله لسګونه کسان مړه شوي چې ستر لاملونه یې د ګازي ډبو چاودنې بلل شوي وو. د یادو پېښو پایلې په ډېرو مواردو کې خونړۍ وې او ځینې ودانۍ یې په بشپړه توګه سوځېدلې وې.
چینايي رسنیو همدارنګه راپور ورکړی چې د تېرو خونړیو اورلګېدنو په تړاو یو شمېر کسان نیول شوي هم وو. د اورلګېدنو پېښې په نړۍ کې د بېلابېلو لاملونو له کبله رامنځته کېږي او ډېری وختونه یې پایلې جدي او وژونکي وي.
