اسلووینیا د افغان ښځو روغتیا لپاره ۲۰۰ زره یورو ځانګړې کوي
د ملګرو ملتونو د وګړو صندوق وایي چې د اسلووینیا حکومت د افغان ښځو او نجونو د روغتیايي خدماتو د پیاوړتیا لپاره ۲۰۰ زره یورو مرسته ځانګړې کړې ده.
د دې ادارې په وینا، دغه مالي ملاتړ به د زیږون مخکې او وروسته پاملرنې، خوندي زېږون او نورو اساسي روغتیايي خدماتو د ښهوالي په برخه کې ولګول شي.
دې ادارې زیاته کړې چې په افغانستان کې ښځې او نجونې لا هم روغتیايي خدماتو ته د لاسرسي له جدي ستونزو سره مخ دي او د نړیوال ملاتړ اړتیا شته.
همداراز ویل شوي چې دا پیسې به د میندو د روغتیا ښهوالي، د امیندوارۍ پر مهال د خطرونو کمولو او د نویو زېږېدلو ماشومانو د ساتنې لپاره وکارول شي.
