بلخ کې یوې مور پنځه ماشومان وزېږول
د بلخ ولایت ابو علي سینا ښوونیز او سیمهییز روغتون کې یوې ۲۸ کلنې مور، نفیسې، په یوه نادره پېښه پنځه ماشومان نړۍ ته راوړي دي.
د روغتون د معلوماتو له مخې، ماشومان له ټاکلي وخته مخکې او په کم وزن زیږېدلي، له همدې امله ټول د نويو زېږېدلو ماشومانو د ځانګړې پاملرنې (NICU) څانګه کې تر دوامدارې طبي څارنې او درملنې لاندې دي.
روغتیايي مسوولین وایي، د مور او ماشومانو روغتیايي وضعیت له نږدې څارل کېږي او متخصص ډاکټران هڅه کوي هغوی ته اړینې طبي اسانتیاوې برابرې کړي، څو روغتیايي حالت یې ښه شي.
د یادونې وړ ده چې د نويو زېږېدلو ماشومانو ځانګړې پاملرنې (NICU) څانګه د بېپولې ډاکټرانو (MSF) په ملاتړ فعالیت کوي او له وخت مخکې زیږېدلو او ځانګړې طبي پاملرنې ته اړتیا لرونکو ماشومانو ته روغتیايي خدمات وړاندې کوي.
