د روسیې د سوداګریز مرکز رییس: د افغانستان او روسیې ترمنځ دې ویزه لغوه شي
د راپورونو له مخې، افغانستان کې د روسیې د سوداګریز مرکز رییس رستم حبیبولین وړاندیز کړی چې د افغانستان او روسیې ترمنځ دې د ویزې نظام لغوه شي.
نوموړي ویلي، د کابل او مسکو ترمنځ اړیکې په چټکۍ سره پراخېږي او د سوداګرو، پانګوالو او سیلانیانو لپاره د سفر اسانتیا کولی شي اقتصادي او سوداګریزې اړیکې لا پیاوړې کړي.
حبیبولین زیاته کړې چې د دواړو هېوادونو ترمنځ وروستي سیاسي او اقتصادي پرمختګونه د همکاریو د پراختیا ښکارندويي کوي او د ویزې لغوه کېدل به د متقابلو اړیکو د لا پراختیا لپاره مهم ګام وي.
د هغه په وینا، دغه اقدام به د سوداګرۍ، پانګونې او سیاحت په برخو کې نوې فرصتونه رامنځته کړي او د دواړو هېوادونو ترمنځ به د تګ راتګ بهیر لا اسانه کړي.
