د سره صلیب نړیوال فدراسیون له افغاني سرې میاشتې سره همکارۍ ته دوام ورکوي
افغاني سره میاشت وایي چې د سره صلیب او سره میاشت نړیوال فدراسیون سرمنشي جنرال چکن چپه ګېن کابل ته راغلی او د افغاني سرې میاشتې له مشر سره یې کتلي دي.
د خبرپاڼې له مخې، په دغه سفر کې د افغانستان لپاره د یاد فدراسیون مشر حسام فیصل هم شامل و او د افغاني سرې میاشتې له رییس شیخ شهابالدین دلاور سره یې لیدنه کړې ده.
په دې کتنه کې دواړو لوریو د بشري فعالیتونو، روغتیايي او مرستندویه خدماتو، د ظرفیت لوړونې پروګرامونو او د متقابلو همکاریو د لا پراختیا په برخه کې پر ګډو هڅو ټینګار کړی دی.
سرچینې وایي، راغلی پلاوی به د افغانانو بشري اړتیاوې، د افغاني سرې میاشتې لاسته راوړنې او د بشري مرستو لومړیتوبونه له نړیوالو شریکانو او مرستندویه ادارو سره شریک کړي. همداراز پلاوي ټینګار کړی چې نړیوال فدراسیون به له افغاني سرې میاشتې سره د مرستو او همکاریو لړۍ روانه وساتي.
په کتنه کې د افغاني سرې میاشتې مسوولینو ویلي چې افغانان د تېرو څو لسیزو جګړو او طبیعي پېښو له امله له پراخو بشري ستونزو سره مخ دي او جدي ملاتړ ته اړتیا لري.
