راپور: امریکا د ایران پر دارخوین اټومي تاسیساتو برید کړی
د راپورونو له مخې، د ایران اسلامي جمهوریت چارواکو ویلي چې د امریکا ځواکونو د یکشنبې سهار د خوزستان ولایت په دارخوین سیمه کې پر هغه اټومي تأسیساتو برید کړی چې لا هم د جوړېدو تر پړاو لاندې دي.
د ایران اسلامي جمهوریت د اټومي انرژۍ ادارې دغه برید په کلکو ټکو غندلی او هغه یې د نړیوالو قوانینو، د ملګرو ملتونو د منشور او د اټومي تأسیساتو د خوندیتوب له اصولو ښکاره سرغړونه بللې ده. ادارې ټینګار کړی چې پر ملکي اټومي زیربناوو برید د منلو وړ نه دی او نړیواله ټولنه باید د دې ډول اقداماتو مخه ونیسي.
بلخوا، د اټومي انرژۍ نړیوال اژانس ویلي چې د دارخوین اټومي پروژه د بیارغونې او جوړېدو په لومړنیو پړاوونو کې وه او د وروستیو تفتیشونو له مخې پکې اټومي مواد نه وو ځای پر ځای شوي.
تر اوسه امریکايي چارواکو د دغو راپورونو او ادعاوو په اړه رسمي غبرګون نه دی ښودلی.
دارخوین د ایران اسلامي جمهوریت له ملکي اټومي پروژو څخه ده چې چارې یې په ۲۰۲۲ کال کې پیل شوې. د چارواکو په وینا، له دې تأسیساتو موخه د برېښنا تولید دی او د نطنز او فردو له هغو اټومي مرکزونو سره توپیر لري چې د یورانیمو د بډاینې له پروګرام سره تړاو لري.
شنونکي باور لري چې پر ملکي اټومي تأسیساتو هر ډول برید کولی شي سیمهییز کړکېچ لا پراخ او د نړیوالو امنیتي اندېښنو کچه لوړه کړي، ځکه نړیوال قوانین د دغسې زیربناوو د خوندیتوب پر رعایت ټینګار کوي.
