روسیه: د سنټ پیټرزبورګ شاوخوا ۲۵ ډرونونه نسکور شوي
د الجزیرې د راپور له مخې، روسي سیمهییزو چارواکو ویلي چې د سنټ پیټرزبورګ ښار په شاوخوا کې ۲۵ بېپیلوټه الوتکې (ډرونونه) شنډې او نسکورې شوې دي.
د راپورونو له مخې، دغه پېښه په داسې وخت کې رامنځته شوې چې روسیه په سنټ پیټرزبورګ ښار کې د خپل مهم نړیوال اقتصادي فورم کوربهتوب کوي؛ هغه غونډه چې هر کال د سیاسي او اقتصادي شخصیتونو پراخ ګډون پکې کېږي.
تر اوسه روسي چارواکو د دغو ډرونونو د سرچینې په اړه رسمي معلومات نه دي خپاره کړي، خو په وروستیو کلونو کې د ورته بریدونو مسؤلیت تر ډېره پر اوکراین ور اچول شوی دی.
د پېښې د احتمالي زیانونو او نورو جزییاتو په اړه لا تر اوسه بشپړ معلومات نه دي ورکړل شوي، خو روسي مسوولین وایي چې امنیتي ځواکونو وضعیت تر کنټرول لاندې راوستی دی.
