مزارشریف کې ۶۷۰ جریبه ځمکه امارتي ملکیت تثبیت شوه
د عدلیې وزارت ویاند برکتالله رسولي وايي، د بلخ ولایت په مرکز مزارشریف ښار کې د «خوادي پروژې» په نوم ۶۷۰ جریبه ځمکه امارتي تثبیت شوې ده.
رسولي په اېکسپاڼه لیکلي، د شمال زون امارتي غصبشویو ځمکو قضیو ته د رسېدنې اختصاصي محکمې د اسنادو او مدارکو له دقیقې ارزونې وروسته، د شرعي حکم پر بنسټ یاده ځمکه امارتي ملکیت بللې ده.
د نوموړي په وینا، دغه ځمکه د مزارشریف ښار په نهمه ناحیه کې موقعیت لري.
څو ورځې وړاندې هم عدلیې وزارت ویلي وو چې یادې اختصاصي محکمې په مزارشریف کې د «مایار مېنې ښارګوټي» په نوم ۳۰۰ جریبه ځمکه امارتي تثبیت کړې ده.
د عدلیې وزارت په وینا، محکمې د متصرفینو او اړوند کمېسیون اسناد، املاکي دفاتر او د اړوندو ادارو معلومات په دقیقه توګه ارزولي او پرېکړه یې کړې چې ټوله ۳۰۰ جریبه ځمکه امارتي ملکیت دی.
