کییف کې د روسیې هوايي بریدونو درې کسان وژلي او درې ټپیان کړي
د اوکرایني چارواکو په وینا، د روسیې په هوايي بریدونو کې د کییف سیمې درې کسان، چې یو ماشوم هم پکې شامل دی، وژل شوي او درې نور ټپیان دي.
د کییف سیمهییزې ادارې مشر تیمور تکاچینکو ویلي، روسي بریدونه د پلازمېنې کییف شاوخوا د بوریسپیل ولسوالۍ په درېیو سیمو کې ثبت شوي دي.
په ورته وخت کې، د کییف ښاروال ویتالي کلیچکو ویلي چې له هوايي بریدونو وروسته د ښار په دوو برخو کې اورونه لګېدلي دي.
راپورونه ښيي چې اوکراین د هغو هوايي دفاعي سیستمونو له کمښت سره مخ دی چې د بالستیک توغندیو د شنډولو وړتیا لري.
روسیې د ۲۰۲۲ کال د فبرورۍ له ۲۴مې راهیسې پر اوکراین پراخ پوځي عملیات پیل کړي او تر اوسه د دواړو هېوادونو ترمنځ جګړه روانه ده.
