په کابل او ولایتونو کې د سلګونو خطرناکو ډبرو د له منځه وړلو عملیات روان دي
د پېښو پر وړاندې د مبارزې چمتووالي ملي ادارې خبر ورکړی چې د کابل ښار په ګډون د هېواد په بېلابېلو ولایتونو کې د خطرناکو ښویېدونکو ډبرو د له منځه وړلو چارې پیل شوې دي.
د دې ادارې ویاند محمد یوسف حماد په ویډیويي پیغام کې ویلي، له تېرو نږدې یوې میاشتې راهیسې د سروې پر مهال ۳۰۱ خطرناکې ډبرې پېژندل شوې او د ویجاړولو عملیات یې روان دي.
د نوموړي په وینا، دغو ډبرو ۱۰۴۵ استوګنیز کورونه او ۶۷ عامه تاسیسات له جدي ګواښ سره مخ کړي وو.
حماد زیاته کړې چې د یادو ډبرو ټولیز حجم شاوخوا ۲ زره ۳۰۰ متر مکعبه دی او د ښویېدو جدي خطر یې موجود و.
هغه ویلي، دا اقدامات د طبیعي پېښو له امله د رامنځته کېدونکو خطرونو د کمولو او د زیانمنونکو سیمو د خوندیتوب په موخه ترسره کېږي.
د سرچینې په وینا، دا مهال د کابل ښار په لومړۍ ناحیه کې ۱۱ لویې ډبرې او په دویمه ناحیه کې پنځه لویې ډبرې ویجاړې شوې او اړوندې سیمې خوندي شوې دي.
