بقایي: د خارک ټاپو پر ضد هر اقدام به له پرېکنده غبرګون سره مخ شي
د ایران اسلامي جمهوریت د بهرنیو چارو وزارت ویاند، اسماعیل بقایي، خبرداری ورکړی چې که امریکا د خارک ټاپو پر ضد هر ډول ځمکنی اقدام وکړي، د ایران اسلامي جمهوریت به پرېکنده او متناسب غبرګون وښيي.
بقایي ویلي، د ایران اسلامي جمهوریت مشران او وسلهوال ځواکونه هر ډول احتمالي سناریو ته بشپړ چمتووالی لري او زیاته کړې یې ده چې د خارک ټاپو پر وړاندې هر ډول «ماجراجویي» به بې ځوابه پاتې نه شي.
خارک ټاپو، چې د ایران اسلامي جمهوریت د نفتو صنعت مهم مرکز بلل کېږي، د بوشهر له سواحلو شاوخوا ۵۵ کیلومتره واټن لري. د راپورونو له مخې، د ایران اسلامي جمهوریت ډېره برخه د خامو نفتو صادرات له همدې ټاپو ترسره کېږي او د هېواد د انرژۍ په اقتصاد کې حیاتي ځای لري.
دا څرګندونې وروسته له هغې شوې چې د امریکا ولسمشر ډونالډ ټرمپ یو ځل بیا د خارک ټاپو په اړه ګواښونه مطرح کړل. نوموړي ادعا کړې چې امریکا ښايي په راتلونکې کې د دې ټاپو پر ضد اقدام وکړي. هغه همداراز د ایران اسلامي جمهوریت پر وړاندې د پوځي عملیاتو او د سپاه پاسداران د کښتیو د په نښه کولو ادعاوې هم کړې دي.
د ایران اسلامي جمهوریت چارواکو د امریکا دا ډول څرګندونې د نړیوالو اصولو او د هېوادونو د ملي حاکمیت پر ضد بللې او ټینګار یې کړی چې هر ډول پوځي اقدام به د سیمې امنیت او ثبات له جدي ګواښ سره مخ کړي.
شنونکي هم باور لري چې خارک ټاپو د ایران اسلامي جمهوریت د انرژۍ له مهمو ستراتیژیکو مرکزونو څخه دی او هر ډول پوځي شخړه به نه یوازې د ایران د نفتو پر صادراتو، بلکې د نړیوال انرژۍ پر بازار هم پراخ اغېز وکړي، ځکه د هرمز تنګي له لارې د نړۍ د نفتو او طبیعي ګازو د لېږد مهمه برخه ترسره کېږي.
د ایران اسلامي جمهوریت ټینګار کړی چې د هېواد د ملي حاکمیت، ځمکنۍ بشپړتیا او حیاتي تأسیساتو دفاع به په قاطع ډول وکړي او د هر ډول بهرني پوځي اقدام پر وړاندې به مناسب او پرېکنده غبرګون وښيي.
