پاریس کې د چاقو برید؛ درې ښځې ټپیانې شوې
د فرانسې پلازمېنې پاریس په «پورت دو کلیشي» سیمه کې یوه کس پر درېیو ښځو د چاقو برید کړی چې له امله یې درې واړه ټپیانې شوې دي.
د رویټرز خبري اژانس د راپور له مخې، د ټپي شویو ښځو له ډلې د یوې روغتیايي وضعیت نازک ښودل شوی دی.
راپور زیاتوي، پولیسو بریدګر نیولی او د پېښې د څرنګوالي او انګېزې په اړه یې پلټنې پیل کړې دي. تر اوسه د برید د علت په اړه رسمي معلومات نه دي خپاره شوي.
دا پېښه داسې مهال رامنځته شوې چې په وروستیو کلونو کې په یو شمېر لوېدیځو هېوادونو کې د چاقو او موټرو په وسیله د تاوتریخوالي پېښې زیاتې شوې دي.
پولیسو ویلي، د ورته پېښو د مخنیوي لپاره به امنیتي تدابیر نور هم پیاوړي کړي او د قانون له سرغړوونکو سره به قانوني چلند وشي.
