هرات کې د غنمو حاصلات ۵۰ سلنه زیات شوي
د هرات ځايي مسوولین وایي، سږکال په دې ولایت کې د غنمو حاصلات د تېر کال په پرتله شاوخوا ۵۰ سلنه زیات شوي او تمه ده چې ټول تولید به ۶۰۰ زره مټریک ټنو ته ورسېږي.
د هرات د کرنې او مالدارۍ خونې د معلوماتو له مخې، سږنی کرنیز کال د مناسبو ورښتونو او ښه اقلیمي وضعیت له امله د بزګرانو لپاره ګټور تمام شوی دی. مسوولین وایي، د بارانونو زیاتوالي او د نباتي افتونو د کمښت له امله د للمي او اوبیزو غنمو حاصلات د پام وړ ښه شوي دي.
کروندګر هم د سږني حاصل په اړه خوښي څرګندوي او وایي چې پرلهپسې ورښتونو د غنمو د ودې لپاره مناسب شرایط برابر کړي، چې له امله به د تېر کال د وچکالۍ زیانونه تر یوه بریده جبران شي.
د کرنې اړوند ادارو د شمېرو له مخې، په هرات ولایت کې سږکال پر شاوخوا ۲۵۰ زره هکټاره ځمکه غنم کرل شوي چې له دې ډلې څه باندې ۱۰۰ زره هکټاره للمي ځمکې دي.
