ټرمپ: له وروستۍ هوکړې وروسته به د ایران او امریکا اقتصادي تعاملات پراخ شي
په سویس کې د ایران اسلامي جمهوریت او امریکا ترمنځ د خبرو اترو د لومړي پړاو له پایته رسېدو وروسته، د ایران ځینې کنګل شوې شتمنۍ ازادې شوې او پر نفتي او پېټروکېمیاوي صادراتو لګېدلي ځینې محدودیتونه هم ځنډول شوي دي.
د ایران اسلامي جمهوریت د بهرنیو چارو وزیر سید عباس عراقچي ویلي، د مذاکراتو له لومړنیو پایلو وروسته د هېواد د اقتصادي فعالیتونو د پیاوړتیا لپاره مهم ګامونه پورته شوي او د ایران ځینې مالي شتمنۍ بېرته د لاسرسي وړ ګرځېدلې دي.
بلخوا د ایران د مرکزي بانک رئیس عبدالناصر همتي ټینګار کړی چې ایران به خپلې ازادې شوې شتمنۍ د خپلو ملي اړتیاوو او اقتصادي لومړیتوبونو له مخې وکاروي.
په ورته مهال، منځګړو هېوادونو د مذاکراتو لومړنی پړاو مثبت او رغنده بللی او هیله یې څرګنده کړې چې راتلونکې خبرې به هم د دواړو لورو ترمنځ د تفاهم او همکاریو د پراختیا لامل شي.
