د زمري نړۍواله ورځ د ځنګلونو د پاچا ساتنې لپاره د خبرداري زنګ
د اګست ۱۰مه د زمریانو له نړیوالې ورځې سره برابره ده؛ هغه ورځ چې هر کال د زمریانو ساتنې، د هغوی د طبیعي استوګنځایونو خوندي کولو او د دې ژوی د بقا لپاره د نړیوالو هڅو د ملاتړ په موخه نمانځل کېږي.
دغه ورځ د چاپېریال او وحشي ژوو ساتنې په اړه د عامه پوهاوي لوړولو ترڅنګ، په طبیعي ایکوسیستمونو کې د زمریانو ارزښت او رول ته د خلکو پام اړوي.
په بېلابېلو هېوادونو کې چاپېریالي بنسټونه او د وحشي ژوو ساتنې فعالان په دې مناسبت د پوهاوي پروګرامونه جوړوي او د زمریانو ساتنې له هڅو ملاتړ کوي.
د زمریانو طبیعي استوګنځایونو له منځه تلل، له انسانانو سره شخړې، ناقانونه ښکار او د خوړو سرچینو کمېدل هغه مهم ګواښونه دي چې په ځینو سیمو کې یې د دغو ژوو پر شمېر فشار زیات کړی دی.
د زمریانو نړیوالې ورځې د رامنځته کېدو نظر چاپېریال ساتونکو رې کوکش او ډېوېډ یولډن وړاندې کړی و.
دواړو هغه مهال د «افریقايي زمریانو د ساتنې او چاپېریالي څېړنو» له خیریه بنسټ (ALERT) سره کار کاوه.
د دغې ورځې لومړني مراسم د ۲۰۱۳ کال د اګست پر ۱۰مه د زامبیا په لیوینګسټون ښار کې ترسره شول.
زمری د پیشوګانو له کورنۍ څخه یو له سترو او پیاوړو غوښهخوړونکو ژوو څخه دی.
د ډېرو نورو پیشوډوله ژوو پر خلاف، زمریان ټولنیز ژوند لري او معمولاً په ډلو کې ژوند کوي.
دوی ډېری وخت په دښتو، شنو ورشوګانو او پرانیستو سیمو کې اوسېږي او د شپې یا د هوا په سړېدو کې ښکار کوي.
اوس مهال د وحشي زمریانو ډېری نفوس په افریقا، په ځانګړي ډول ختیځې او سویلي برخو کې موندل کېږي.
تانزانیا، کینیا، بوتسوانا، سویلي افریقا او زامبیا هغه هېوادونه دي چې د زمریانو د پام وړ نفوس لري.
له افریقا بهر، د اسیايي زمري یوازینی پاتې اصلي وحشي نفوس د هند د ګجرات ایالت په ګیر سیمه کې ژوند کوي.
زمریان پخوا د افریقا، اسیا او اروپا په پراخو سیمو کې اوسېدل؛ خو د استوګنځایونو له منځه تلو، د ښکارېدونکو ژوو کمېدو، له انسانانو سره د شخړو او ښکار له امله یې د اوسېدو پراخه سیمې او شمېر په پام وړ کچه راکم شوي دي.
