پنجشېر کې د ۱۲۵ زره ډالرو په ارزښت ۵۰ کرنیزې پروژې بشپړې شوې
په پنجشېر ولایت کې د ۱۲۵ زره امریکايي ډالرو په ارزښت ۵۰ کرنیزې پروژې ګټې اخیستنې ته سپارل شوې دي.
په دغو پروژو کې د درې، حصه اول او مرکز ولسوالیو په بېلابېلو سیمو کې د ۵۰ شنوخونو جوړول شامل دي، چې د سبزیجاتو تولید او کرنیزو نیالګیو روزنې لپاره کارول کېږي.
ځايي مسوولین وايي، په نږدې ورځو کې به یو زر بزګرانو ته اصلاح شوي د غنمو تخمونه او کیمیاوي سره ووېشل شي.
همداراز، په وروستیو ورځو کې ۱۵۰ بزګرانو ته د رېبلو ماشینونه هم ورکړل شوي دي.
د مسوولینو په وینا، دغه پروژې د کورنیو کرنیزو تولیداتو زیاتوالي، بزګرانو ملاتړ، کاري فرصتونو رامنځته کولو او په پنجشېر کې د خوړو خوندیتوب پیاوړتیا لپاره پلې شوې دي.
