روسیه د امریکا له نویو بندیزونو سره مخ کېږي
امریکايي رسنیو راپور ورکړی چې د امریکا استازو جرګې هغه طرحه تصویب کړې چې له مخې به یې پر روسیې نوي بندیزونه ولګېږي.
د ګارډین د راپور له مخې، که څه هم یو شمېر امریکايي قانونجوړوونکو له دې طرحې سره مخالفت کړی و، خو استازو جرګې په تازه اقدام کې طرحه تصویب کړه.
د راپور له مخې، په طرحه کې د روسیې پر سیاسي او پوځي چارواکو او ځینو بهرنیو شبکو د بندیزونو لګول شامل دي.
دغه طرحه همداراز د روسیې د هغو تېلو وړونکو بېړیو پر شبکې د بندیز وړاندیز کوي چې د «سیوري بېړیو» په نوم یادېږي.
امریکايي رسنیو ویلي، روسیې له دې شبکې په ګټې اخیستنې سره، د امریکا له بندیزونو سره هممهاله، خپلو تېلو صادراتو ته دوام ورکړی دی.
ګارډین لیکلي، د طرحې د تصویب پر مهال د استازو جرګې د ډیموکراتانو مشر د هغې په اړه ناخوښي څرګنده کړې او پر امریکايي اقتصاد یې د احتمالي منفي اغېزو په اړه اندېښنه ښودلې ده.
د طرحې له تصویب وروسته، د امریکا ولسمشر ډونالډ ټرمپ ته واک ورکول کېږي چې د روسیې د انرژۍ پر سترو پېرودونکو تر ۱۰۰ سلنې پورې تعرفه ولګوي او پر مسکو نور بندیزونه هم عملي کړي.
