ایراني نفتوړونکې بېړۍ د امریکا له سمندري محاصرې تېر شوه
د نړیوالو سرچینو د راپورونو له مخې، یوه ایراني نفتوړونکې بېړۍ چې نږدې دوه میلیونه بېرله خام تېل یې لېږدول، د امریکا له لوري اعلان شوې سمندري محاصرې سره سره وتوانېده چې د ختیځې اسیا پر لور خپل مسیر ته دوام ورکړي.
د سریع خبري اژانس د راپور له مخې، د الجزیرې په حواله، د سمندري څارنې وېبپاڼې تانکر ټرېکرز اعلان کړی چې یوه ایراني نفتوړونکې بېړۍ چې ۱ میلیونه او ۹۰۰ زره بېرله خام تېل یې لېږدول، د امریکا د اعلان شوې سمندري محاصرې سره سره وتوانېده له سیمې تېر شي او د ختیځې اسیا بازارونو ته ځان ورسوي.
د راپور له مخې، د سمندري تګ راتګ د تعقیب مرکزونو خپاره شوي معلومات ښيي چې د اپرېل میاشتې له ۱۳مې نېټې راهیسې، چې امریکا د ایران له بندرونو سره تړلو بېړیو پر وړاندې د سمندري محاصرې د عملي کولو اعلان وکړ، بیا هم د پام وړ شمېر بېړیو خپل فعالیت ته دوام ورکړی دی.
د الجزیرې شبکې وېبپاڼې پرون راپور ورکړ چې له څېړل شویو ۱۴۵ بېړیو څخه ۸۱ بېړۍ، د امریکا له لوري اعلان شويو محدودیتونو سره سره، د هرمز له تنګي څخه تېرې شوې دي. دا شمېر د ټولو بېړیو شاوخوا ۵۶ سلنه جوړوي او ښيي چې په دې مهمې انرژۍ لارې کې سمندري تګ راتګ لا هم روان دی.
همدارنګه د «مارین ټرافیک» پلېټفارم د معلوماتو شننه ښيي چې ۵۳ بېړۍ د امریکا د ادعا شوې محاصرې باوجود د هرمز له تنګي څخه تېرې شوې دي. دا بېړۍ یا د ایران د اسلامي جمهوریت له بندرونو روانې شوې وې، یا یې منزل ایراني بندرونه وو، او یا هم د ایران تر بیرغ لاندې فعالیت کاوه. د همدې راپور له مخې، له دغو بېړیو څخه ۱۱ بېړۍ د امریکا د بندیزونو په لېست کې شاملې وې.
دغه شمېرې ښيي چې د یو اړخیزو فشارونو او بندیزونو سره سره، د ایران اړوند د انرژۍ صادرات او سمندري تګ راتګ لا هم دوام لري او د هغه د بشپړ محدودولو هڅې له جدي ستونزو سره مخ دي.
