د کینیا محکمې پرېکړه: ظاهر قدیر امریکا ته سپارل کېږي
د کینیا عالي محکمې پرېکړه کړې چې د افغانستان د ولسي جرګې پخوانی غړی ظاهر قدیر به امریکا ته وسپارل شي.
قاضي الکزاندر مټېټیو په خپل حکم کې ویلي، د ابتدايي محکمې پرېکړه قانوني ده او تاییدېږي. د پرېکړې اعلان پر مهال قدیر هم محکمې کې حاضر و.
د مدافع وکیلانو له لوري ادعا شوې وه چې د کینیا او امریکا ترمنځ د بندیانو د سپارلو رسمي هوکړه نشته او تورونه سیاسي بڼه لري، خو محکمې ویلي چې د نړیوالو منل شویو اصولو له مخې دا ډول سپارنه ممکنه ده.
محکمې وکیلانو ته یوه میاشت مهلت ورکړی، څو سترې محکمې ته خپل اعتراض وړاندې کړي.
