نیمروز کې د ۱۱۰ کسانو د قاچاق مخه نیول شوې
د نیمروز ولایت امنیه قومنداني وایي، د اسلامي امارت د رهبر د فرمان پر بنسټ د دې ولایت د امنیه قومنداني عملیاتي ځواکونو د درېیمې امنیتي سرحدي پوستې او دهمالدارو سیمې په مربوطاتو کې د ۱۱۰ کسانو د قاچاق مخه نیولې ده، چې غوښتل یې نورو هېوادونو ته ولېږدول شي.
د یادې قومنداني د رسنیو او عامه اړیکو آمریت زیاتوي، د انساني قاچاق په تور دوه کسان له ټویوټا او خوستي ډوله موټرو سره نیول شوي دي.
بلخوا د جنايي جرمونو پر وړاندې د مبارزې مدیریت مسوولین وایي، له تېرې اوونۍ راهیسې د زرنج ښار په بېلابېلو برخو کې ۵۲ کسان د غلا، اخلاقي فساد، شخړو او نامشروع اړیکو په تور نیول شوي دي.
مسوولین زیاتوي، نیول شوي کسان به له لومړنیو څېړنو وروسته عدلي او قضایي ارګانونو ته وسپارل شي.
