پزشکیان د ګاونډیو هېوادونو له همکاریو مننه وکړه
د ایران ولسمشر مسعود پزشکیان د پاکستان د کورنیو چارو وزیر محسن نقوي سره په لیدنه کې د ګاونډیو هېوادونو همکاري او مسوولیتپالنه ستایلې ده.
په کابل کې د ایران سفارت د معلوماتو له مخې، پزشکیان ویلي چې د ایران پر وړاندې د خپلو خاورو د نه کارونې په برخه کې د سیمې د هېوادونو همکاري ارزښتناکه وه او په ځانګړي ډول یې له افغانستان، عراق او پاکستان څخه مننه کړې ده.
نوموړي ټینګار کړی چې تهران له اسلامي او سیمهییزو هېوادونو سره د اړیکو پیاوړتیا او پراخو همکاریو ته لېوالتیا لري.
د راپور له مخې، په دې لیدنه کې د سیمهییزو اړیکو، امنیتي همکاریو او دوهاړخیزو تعاملاتو په اړه هم خبرې شوې دي.
