اروپايي ټولنه د افغان کډوالو د ستنېدو د منظم بهیر پر همغږۍ ټینګار کړی
د اروپايي ټولنې د کډوالۍ کمېشنر مګنوس برونر ویلي چې له اړوندو افغان مسوولینو سره خبرې اترې د کډوالۍ د مدیریت او د ستنېدو د بهیر د منظمولو لپاره مهمې بلل کېږي.
نوموړي په خپلو څرګندونو کې ویلي چې د دغو اړیکو او خبرو موخه دا ده څو د کډوالو د ستنېدو بهیر په ګډه، منظم او قانوني ډول تنظیم شي او د اروپايي ټولنې غړي هېوادونه وکولای شي خپل اجراآت په دې برخه کې لا ښه همغږي کړي.
برونر ټینګار کړی چې د اروپايي ټولنې هېوادونه او اړوند کمېسیون باید د دې بهیر د عملي کېدو لپاره ګډې هڅې جاري وساتي، څو د کډوالۍ مدیریت او د ستنېدو چارې له ټاکلو اصولو سره سم پر مخ ولاړې شي.
نوموړي همداراز زیاته کړې چې د کډوالۍ موضوع د نړیوالې همکارۍ غوښتونکې ده او د ټولو اړخونو ترمنځ همغږي کولای شي د دې برخې د ننګونو په کمولو کې مهم رول ولوبوي.
